Ah bwoy (*hiss teeth*) traffic? And di sun so hot
Da light ya more often red than not
How come my lane nah move?
Hey bus bwoy, a weh yuh a try prove?
Di whole a oonu act like a oonu one late
Watch her a let thru everybody like stadium gate
Dat likkle whore, drive up di ol' car
Mi cell phone a ring;
Lawd, a di boss a call me enuh star
Raass, a so it late? but mi leff 2 hour ago
An' all now mi caan reach weh me a go
The Po-Po's up deh, oh.... dat's why.
Him come een like intersection, a ask leff or write
Beg yuh a bly nuh, mi waan come over
You see it tho, mi should a have a range rover
A bet dem would a give me di bly
Dutty johncrow, yuh want a shot inna yuh eye
Thank yuh darlin', she sweet eh?
oh shit, wind up di glass
A di same woman weh mi jus' tell bout her raass
Well di likkle whore nuh dat bad after all
What di hell? Thir-teen miss call?
A di boss keep on a call me
Let me thru Missa Officer, is a emergency
Wah di rass wrong wid dis fassyhole
Yeah man, bad drive me and almost end up inna di lightpole
Serve yuh right
Well... almost reach work
Weh me a go tell di boss?
Mi already late four time this week
But a nuh my fault
Mi wake up early, mi see traffic
So when mi wake up late, me nah panic
Nuh matter wah time mi leff, mi a go late anyway
Mi all a do overtime and dem nuh waan pay
Man a kill out dem self wid nowadays slavery
Den dem invent bare tax fi tek out a mi money
Me jus reach work an' already mi tired
Weh u seh Boss call me inna him office?
Yo a war if him ever tell mi those two little words....
...you're fired
Kavon McKenzie 2009
